Gjatë këtij viti, Junior Achievement Albania vijoi të investojë në zhvillimin profesional të mësuesve, duke trajnuar dhe akredituar mbi 400 mësues në programe që synojnë zhvillimin e aftësive për nxënësit.

Rreth 220 mësues të arsimit parauniversitar u trajnuan për modulin "Financat Personale", ndërsa 190 mësuese të arsimit parashkollor u akredituan për modulin "Vetvetja". Trajnimet u zhvilluan në Durrës, Elbasan, Dibër, Gjirokastër, Pogradec, Berat, Shkodër dhe Tiranë, duke forcuar kapacitetet e mësuesve për të zbatuar metoda bashkëkohore të mësimdhënies.

Njëkohësisht, 18 mësues të arsimit të mesëm u akredituan për modulin "Lider për një Ditë", i cili u ofron nxënësve mundësinë të zhvillojnë aftësi lidershipi, vetëbesim dhe aftësi të buta përmes të nxënit praktik.

Përmes këtyre trajnimeve, mësuesit pajisen me njohuritë, metodologjitë dhe mjetet e nevojshme për të zbatuar mësimdhënien e bazuar në përvojë. Në këtë mënyrë, ata kontribuojnë që mijëra nxënës të zhvillojnë aftësi financiare, sipërmarrëse dhe personale, të domosdoshme për përgatitjen e tyre për jetën dhe tregun e punës.